༄༅།། སྤྱིར་བདག་ཅག་གྱི་སྟོན་པ་སངྱས་ཀྱིས་ སྔོན་བསྐལ་པ་བཟང་པོའི་དུས་ལུ་ ནད་རིགས་མ་འདྲཝ་བཞི་བརྒྱ་རྩ་བཞི་ཙམ་ཡོད་པའི་སྐོར་བཀའ་དང་བསྟན་བཅོས་ཚུ་ནང་གསུངས་ཡོད་རུང་ ད་རེས་སྙིང་མ་ལྔའི་དུས་ལུ་ འབྱུང་བ་བཞི་འཁྲུགས་པའི་རྐྱེན་མང་ གནམ་གཤིས་ལུ་འགྱུར་ལྡོག་ཆེ་ ཚ་དྲོད་ལུ་འཕེལ་འགྲིབ་ཞུགས་ཏེ་ སྔོན་ཕྱིད་ཐོས་མྱོང་མེད་པའི་ནད་གཞི་ མཐོང་མྱོང་མེད་པའི་རྨ་ཁ་དང་ རེག་མྱོང་མེད་པའི་ནཱ་ཟུག་རྣམ་པ་སྣ་ཚོགས་ མི་དང་སེམས་ཅན་གཉིས་ཀའི་འབྱུང་བཞི་ལུས་ལུ་ཐྱིབས་ཏེ་ མི་འདོད་པ་ཐོག་ཏུ་འབབ་པའི་སྡུག་བསྔལ་གྱིས་བཟྱི་བཞིན་ འཇིག་རྟེན་སྐྱོང་ས་མཐོངམ་ཨིན་མས།།
སྒོས་སུ་རང་རེ་འབྲུག་རྒྱལ་ཁབ་འདི་ ཕལ་ཆེར་འཛམ་གླིང་གཅིག་འགྱུར་མཁའ་དབྱིངས་གློག་འཁྱུག་པ་ལྟ་བུའི་འགྲོས་བཏང་དང་བསྟུན་ ཡར་རྒྱས་ཀྱི་གོམ་པ་མདུན་དུ་སྤོ་བཞིན་པའི་མཐུ་ལས་ ཕྱི་ནང་གསང་གསུམ་གྱི་ནད་གཞི་བཅོ་ཐབས་ལུ་ སྨན་ཁང་ལེ་ཤ་གཞི་བཙུགས་འབད་དེ་ གསོ་བ་རིག་པའི་སློབ་སྦྱོང་སྤེལ་ཐབས་མཛད་གནངམ་མ་ཚད་ སྐུ་ཡོན་སྦོམ་གཟྱིགས་ཡོད་པའི་སྨན་པ་མཁས་པ་ལེ་ཤ་ཡོད་རུང་ ལོ་ལྟར་བཞིན་ ནད་གཞི་ཚབས་ཆེན་ལེ་ཤ་འཐོན་ཡོད་པའི་མངོན་གསལ་འབྱུངམ་མ་ཚད་ ཁའི་ཀེན་སར་
འཐོབ་མི་རྒྱང་ཁ་འདི་ལོ་ལྟར་བཞིན་ཡར་སེང་འགྱོ་དོ་ཡོདཔ་ཨིན།
འཛམ་གླིང་གསོ་བའི་ལས་ཁུངས་ཀྱི་སྙན་ཞུ་ལྟར་དུ་འབད་བ་ཅིན་ ལུང་ཕྱོགས་ནང་ལུ་ ཁའི་ཀེན་སར་ལས་བརྟེན་ཏེ་ཤི་རྐྱེན་བྱུང་མི་གི་གནས་ཚད་ཁར་ འབྲུག་རྒྱལ་ཁབ་འདི་མཐོ་ཤོས་གཉིས་པ་ཨིནམ་སྦེ་མཐོང་མི་འདི་ ག་ར་གིས་ཚ་རྒྱང་ལང་དགོ་པའི་གཞི་ཅིག་ལུ་ལྷོད་དེ་ཡོདཔ་ཨིན།
ནད་གཞི་འདི་རྒྱུ་རྐྱེན་ག་ཅི་ལས་བརྟེན་ཏེ་ཨིན་ན་ཟེར་བ་ཅིན་ མི་རྒས་གཞོན་དང་དྲག་གཞན་དབྱེ་བ་མེད་པར་ ཟོས་ཀྱང་ཆོག་ལ་གཡུག་ཀྱང་ཆོག་པའི་ རྡོག་མ་པ་ནི་ཙུ་ནེ་གསུམ། བླངས་ཀྱང་འགྲིག་ལ་བོར་ནང་རུང་བའི་ སྨྱོ་ཟས་ཏམ་ཁུ། བག་མེད་སྤྱོད་པས་འཇིག་རྟེན་སྨྱོས་པའི་ཆང་། གྲོད་ཁོགས་ལྟོགས་དུས་ཐད་ཀར་འབྱོར་བའི་ གོང་ཆེན་མིན་པའི་ཁ་ཟས་རིགས་ཚུ་ལོངས་སུ་སྤྱོད་དེ་ ཁའི་དབང་པོ་གཙང་སྦྲ་སྟོན་མ་ཚུགས་པའི་སྒྱུ་རྐྱེན་ལས་བསྟེན་ཨིན་མས།
ཁའི་ཀེན་སར་གྱི་ནད་འདི་ ཁ་ མགྲིན་པ་ སྣ་ སྦུ་གུ་ཁོག་སྟོང་(sinus)དང་ མཚིལ་མའི་རྨྤེན་བུ་(salivary
glands) ཚུ་གང་རུང་ལུ་ཀེན་སར་གྱིས་གནོད་པ་ཅིན་ ཁའི་ཀེན་སར་ཁོངས་སུ་གཏོགསཔ་ཨིན། ནད་རྟགས་ཡང་ག་དེ་སྦེ་སྟོནམ་སྨོ་ཟེར་བ་ཅིན་ རྩ་བ་ནས་མ་དྲག་པའི་ཁ་ལུ་རྨ་ཐོན་ ཁྲག་དང་ཆུ་སེར་སོགས་དུས་རྟག་པར་ཐོན་ནི་ ཁའི་པགས་པ་སྟུག་པོ་འགྱོ་ནི་དང་ སོའི་རྩ་བ་ལྷང་ལྷོང་སྒྲིང་སྒྲིང་མེད་པ་དང་ ཡང་མ་དག་པར་སྐྱོ་དྲགས་སྦེ་སོ་ཚབ་བཙུགས་ནི་ ཁ་རྫས་བཟའ་བའི་སྐབས་ཁའི་རྨ་ནཱ་ཟུག་རྐྱབ་ནི་ཚུ་དང་ མགྲིན་པའི་རྨ་ཁ་ནཱ་ཟུག་སྐྱབ་ནི་ཚུ་ཨིན།
གཞན་ཡང་ཁའི་ནང་དུ་ཚོན་ཁྲ་དཀར་དམར་སྦེ་རྨ་ཐོན་པ་ཅིན་ དེ་ལུ་erythroleukoplakiaཟེར་སླབ་ཨིནམ་ལས་ དེ་གིས་ཀེན་སར་ལུ་འགྱུར་ནིའི་ཉེན་ཁ་སྦོམ་ཡོད། རྨ་ཚོན་ཁྲ་དཀར་དམར་སྦེ་ཐོབ་སྟེ་བདུན་ཕྲག་གཉིས་ལྷག་སོང་པ་ཅིན་ དེ་འཕྲལ་ལས་སོའི་སྨན་པ་དང་འཕྱད་དེ་སྨན་བཅོས་འབད་དགོ། ཁ་ལུ་ཚུལ་མིན་གྱི་རྟགས་ཚན་ཚུ་ དཔེར་ན་ནཱ་ཟུག་རྐྱབ་ནི་བཟུམ་ རང་གི་མ་ཚོར་རུང་ མིག་གིས་མཐོངམ་ཨིན། དེ་ཡང་ཐོག་མའི་དུས་ལུ་ ཁ་ནང་འཕྲལ་འཕྲལ་ནཱ་ཟུག་ཆེནམ་ཅིག་ག་ཅི་ཡང་མེད་རུང་ ཀེན་སར་ཐོབ་ཚརཝ་ཨིན།
ཆང་དང་ཏམ་ཁུ་འདི་ ཆོས་དང་འཇིག་རྟེན་ ཚན་རིགས་གསུམ་ཆ་རའི་ཐད་ལས་ བཟའ་འཐུང་སྤྱོད་མ་བཏུབ་སྦེ་བདེན་ཁུངས་བསྐྱལ་ཡོདཔ་ལས་ མི་ཕལ་ཆེ་བ་གིས་ཆང་ནི་ངེས་པ་གསུམ་གྱི་རྩ་བ་ཨིནམ་ཤེསཔ་མ་ཚད་ ཁའི་ཀེན་སར་ཐོབ་ཧ་གོ། རྡོག་མ་ཡང་ རྒྱ་གར་གྱི་གསོ་བའི་གནས་དེབ/གསར་ཤོག་ཅིག་ནང་དཔེ་སྐྲུན་འབད་མི་དང་འཁྲིལ་བ་ཅིན་ ལང་ཤོར་དང་གོམ་འདྲིས་ངན་པ་ཚུད་དེ་ཁའི་ཀེན་སར་ཐོབ་པའི་རྒྱུ་ཨིནམ་སྦེ་ངོས་འཛིན་ནུག།
ཁའི་ཀེན་སར་འདི་ ཕོ་མོ་འདོད་འཚིམ་བཅུད་ཅན་གྱི་འཁྲིག་སྦྱོར་ལས་བརྒྱུད་པའི་ནད་འབུཔ་ཕྲ་མོ་papillomavirus (HPV) གིས་ཐོབ་དོ་ཡོདཔ་མ་ཚད་ མི་གང་རུང་རང་སོའི་ལུས་ཀྱི་ནད་ཐུབ་ཞན་ཁོག་ཐལ་ཏེ་ ལུས་ཁམས་སྒྲིང་སྒྲིྱིང་མེད་པའི་དབང་གིས་ཐོབ་ཨིན།
འཇིགས་སུ་རུང་བའི་ནད་གཞི་ལས་བརྟེན་ ནདཔ་རང་སོའི་འཕྲོད་རྟེན་འདི་ལོད་ཀྱང་ མཐའ་ན་གང་ཟག་དེའི་ཕྱོགས་སུ་རྟོགས་པའི་གཉེན་ཉེ་འཁོར་ཚུའི་སེམས་ཁམས་ཀྱི་གཞི་བདེ་ལུ་ཡང་ གནོད་པ་སྦོམ་ཡོདཔ་མ་ཚད་ ནད་གཞི་འདི་དྲག་ཐབས་ལུ་ སྨན་བཅོས་རིམ་གྲོ་འབད་བའི་ཚེ་ རྒྱུ་ནོར་ལེ་ཤ་རླགས་དགོཔ་དང་ རྒྱ་ཆེ་བ་རྒྱལ་ཁབ་ཀྱི་དཔལ་འབྱོར་ལུ་ཡང་ཐོ་ཕོག་དོ་ཡོདཔ་ཨིན། དེ་ཡང་རྒྱལ་ཡོངས་གཙོ་རྟེན་སྨན་ཁང་གི་སྙན་ཞུ་དང་འཁྲིལ་བ་ཅིན་ འདས་པའི་ལོ་ངོ་བདུན་གྱི་རིང་ ལོ་ལྟར་བཞིན་ནདཔ་༤༠་ལྷག་ཙམ་
སྨན་བཅོས་འབད་བར་ རྒྱ་གར་རྒྱལ་ཁབ་ནང་བཏང་མི་གི་ཟད་འགྲོ་རྩིས་ལུ་ཕབ་ན་ ལོ་ལྟར་གཞུང་གིས་ཡོངས་སྡོམས་ཟད་འགྲོ་འབུམ་༣༠་བར་བཏང་དོ་ཡོདཔ་ཨིན།
འདས་པའི་ལོ་ངོ་ལྔའི་རིང་ལུ་ ཀེན་སར་ཐོབ་མི་གང་ཁ་འདི་གསུམ་སྒྱུར་གྱི་ཡར་སེང་སོང་ཡོདཔ་སྦེ་ ཀེན་སར་མཁས་ཆོག་དྲུང་ཚོག་ཨོ་རྒྱན་མཚོ་མོ་གིས་གསུང་ཡོདཔ་མ་ཚད་ འཇིགས་མེད་རྡོེ་དབང་ཕྱུག་གཙོ་རྟེན་སྨན་ཁང་ནང་ལུ་ ལོ་ལྟར་བཞིན་ནད་གཞི་ཐོབ་མི་ མི་ངོམ་༤༠༠ ལྷག་ཙམ་རེ་ངོས་འཛིན་འབྱུང་དོ་ཡོདཔ་ཨིན།
ནད་མ་འོང་གོང་ཟླྲོག། ཆུ་མ་འོངས་གོང་རགས། ཟེར་དོ་བཟུམ་ ནད་གཞི་མཐའ་སྡུག་དེ་བཟུམ་གྱིས་ རང་གི་ཡུན་ཐུང་ཁབ་ཀྱི་རྩེ་མོ་བཟུམ་གྱི་མི་ཚེ་དེ་ལུ་བར་ཆད་རྐྱབ་མ་ཅུག་པར་ གཟུགས་ཁམས་འཕྲོད་རྟེན་བདག་འཛིན་འཐབ་ནིའི་དོན་ལུ་ གོང་ལུ་བཤད་པའི་སྨྱོ་རྫས་ཚུ་ ད་ཚུན་སྤྱོད་ན་ བཤགས་སྦྱངས་དང་ ཕྱིན་ཆད་སྲོག་ལ་འབབ་ཀྱང་ མི་སྤྱོད་སང་ནི་གི་དམ་བཅའ་བླངས་དགོཔ་གལ་ཆེ།
ནད་གཞི་ལྕི་ན་སྨན་པ་གང་བྱུང་བསྟེན། གྲོད་པ་ལྟོགས་ན་ཟས་ལ་དབྱེ་བ་མེད། ཟེར་དོ་བཟུམ་ རང་གི་གཟུགས་ལུ་ནད་གཞི་འ་ནེ་བཟུམ་བཏབ་དེ་ཡོད་པ་ཅིན་ འཕྲལ་དང་མྱུར་དུ་སྨན་ཁང་ནང་འབྱོན་ཏེ་ཞིབ་དཔྱད་མཐྱིལ་འཕྱིན་མཛད་དགོཔ་མ་ཚད་ སྨན་པ་དང་སྨན་ཚུ་ཡུན་རིང་བསྟེན་དགོཔ་ཅི་ནས་ཀྱང་གལ་ཆེ།
དྲུང་ཚོ་ཨོ་རྒྱན་མཚོ་མོ་གིས་གསུངས་མི་ནང་ལུ་འབད་བ་ཅིན་ རྒྱལ་ཁབ་ནང་ཀེན་སར་ཐོབ་མི་མངམ་འཐོན་མི་འདི་ ནད་ངོ་བརྟག་དཔྱད་འབད་ནི་གི་ དུས་ཚོད་ཕྱི་དོ་ཡོདཔ་ལས་བསྟེན་ཨིནམ་ལས་ གལ་སྲིད་ནད་གཞི་བརྟག་དཔྱད་འདི་ཧ་སུ་ཅིག་སྦེ་འབད་བ་ཅིན་ ནད་གཞི་ཐོབ་མི་གི་གངས་ ལེ་ཤ་གི་མར་འབབ་འགྱོ་ནི་ཨིནམ་སྦེ་བཀོད་
ནུག།
གཞན་ཡང་འབྲུག་མི་མང་ཆེ་བ་ཅིག་ལུ་ གསོ་བའི་སློབ་སྟོན་དང་ཡོན་ཏན་དཀོན་པའི་སྟབས་ཀྱིས་ ཨེགས་རེ་(X-ray)ཚར་ལེ་ཤ་བཏང་དོ་ཡོད་པའི་རྐྱེན་གྱིས་ ཀེན་སར་ཐོབ་དོ་ཡོདཔ་སྦེ་ཤེས་གཏོགས་འབྱུང་ནུག། རྒྱུ་མཚན་དེའི་ཕྱིར་དུ་ ཨེགས་རེ་ ཡང་ཡང་བཏང་ནི་ལས་འཛེམ་དགོཔ་ཁག་ཆེ།
གལ་སྲིད་ནད་གཞི་འདི་བཟུམ་ཐོབ་སྟེ་ སྨན་བཅོས་ཀྱི་ལམ་ལུགས་ཧ་མ་གོ་བར་ རྨོངས་པའི་ལམ་དུ་ལྷུངས་ན་ མགོ་འཐོམ་བསལ་བར་བྱེད་པའི་གཞུང་མིན་ལས་ཚོགས་ འབྲུག་ཀེན་སར་ཚོགས་པ་ཟེར་མི་ཅིག་གཞི་འཙུགས་འབད་ཡོད་མི་དང་འབྲེལ་བ་འཐབ་པ་ཚུགས་པ་ཅིན་ ལས་ཚོགས་འདི་གིས་ཉེ་བར་འཁོར་བའི་ལམ་སྟོན་དང་བསླབ་བྱ་གནང་ཐོག་ལས་ སྨན་བཅོས་འབད་ནི་ལུ་ ཕན་
རླབས་ཆེཝ་ཨིན།
བསྐལ་ལྡན་ལས་འཕྲོ་ཅན་གྱི་འབྲུག་མི་ཚུ་ ཕྱི་རྒྱལ་གྱི་མི་རྣམས་དང་འཕྱདཔ་ད་ ནད་གཞི་འདི་མ་ཐོབ་སྔོན་འགོག་འབད་ཚུགས་པའི་ཐབས་ལམ་བསམ་གྱིས་མི་ཁྱབས་པར་ཡོན་མི་ཚུ་ དང་ལེན་འབད་དགོ། དེ་ཡང་སངྱས་ཀྱི་
གསུངས་ བླམ་སློབ་དཔོན་ཚུའི་དམ་ངག་ཟབ་མོ་དང་ ཐོས་བསམ་སྒོམ་གསུམ་གྱི་ཡོན་ཏན་དཔལ་ལུ་སྤྱོད་དེ་ ཀེན་སར་ཐོབ་པའི་གཞི་ རྫས་ངན་ཏམ་ཁུ་ཆང་རིགས་སོགས་ ཤེས་བརྗོད་འཇུག་གསུམ་གྱི་གོ་ལས་ྤསང་དགོ། རྫས་ངན་འདི་ཚུ་སྤྱོད་པའི་ཉེས་པ་དང་གནོད་པ་ཚུ་ཧ་གོ་བ་ཅིན་ ྤསང་ཐབས་འབད་ནི་ལུ་ལྷན་ཐབས་འབདཝ་ཨིན།
རྣམ་པར་དག་པའི་གནས་སྐབས་གཞན་ཡང་ ངན་པའི་ཟས་ཚུ་བཤོལ་ཏེ་ ག་དུས་ཟས་ཀྱང་སེམས་སྐྱིད་མ་ཚད་ མི་ཚེ་གང་པོར་ཟོས་ཀྱང་ཆོག་པའི་ དཀར་ཟས་དང་ཟས་བཅུད་ལྡན་པའི་ ཤིང་འབྲས་རིགས་ཚུ་ལོངས་སྤྱོད་ཚུགས་ན་ ནད་གཞི་བཀག་ཚུགས་པའི་ཁེ་ཕན་བསམ་ལས་འདས།
ལྷག་པར་དུ་ རང་གི་མི་ཚེ་སྐྱིད་པའི་དཀྱིལ་ལུ་ བྱད་ངོ་རིས་དང་གཟུགས་གཞི་ལེགས་པའི་གཟྱི་བརྗིད་དཔལ་འབར་གྱི་དབང་སྐྱེད་དེ་ ནད་ཀེན་སར་མ་ཚད་ག་ཅི་འོང་རུང་ ཕྲོད་རྟེན་ལུ་དོ་འགན་མ་ཚུགསཔ་ལས་ ཡང་དག་ཟས་ལུ་སྤྱོད་
པའི་ཕན་ཡོན་ཨིན།
ད་རུང་ནད་རྒྱ་ལུ་སྨན་གཅིག་ལྟ་བུའི་ཐབས་ཤེས་འདི་ སུའི་ངོ་ལའང་ལྟ་དགོས་མེདཔ་དང་ གཡས་དང་གཡོན་ལ་འཚེར་དགོས་མེད་པའི་ བསིལ་ཞིང་འཇམ་པ་འདལ་གྱིས་འབབ་པའི་ཆུ་གང་མང་མང་འཐུང་དགོ། དེ་ཡང་ཆུའི་ནང་དུ་ གངས་ལས་འདས་པའི་ འབུབ་ཕྲན་ལེ་ཤ་ཡོདཔ་ལས་ ནད་གཞི་གཞན་ཡང་ཐོབ་ཉེན་ཡོད་བཞིན་ ཆུ་ཡང་ཐབ་ཁར་བཀོལ་འཐུང་ དེ་མེན་གློག་མེ་ཆུ་བཙག་ཚུ་ནང་བཙག་སྟེ་ འཐུང་དགོཔ་ཨིན།
ཁའི་ཀེན་སར་ཐོབ་པའི་དུས་ནམ་ཤརཝ་སྨོ་ཟེར་བ་ཅིན་ གྲོགས་ངན་པ་དང་སྡོམས་ ཟས་ངན་སྨྱོ་རྫས་འཐུང་སྤྱོད་འབད་དེ་ བཀྲ་མ་ཤིས་གཡང་མ་ཆགས་པའི་བྱ་སྤྱོད་མཐའ་སྡུག་སི་སི་ལུ་ཤུགས་ཐལཝ་ལས་ ནད་གཞི་ཐོབ་ཨིན། རྒྱུ་མཚན་དེའི་ཕྱིར་ ཟས་ངན་སང་འདོད་རུང་གྲོགས་ངན་མ་སངས་ན་ སྨྱོ་རྫས་ཏམ་ཁུ་སོགས་སང་མི་ཚུགསཔ་ལས་ གྲོགས་ངན་རྫམ་གྱི་ཨུབ་དང་འདྲ།། གང་རེག་ཐམས་ཅད་ནག་པོ་འགྱུརཝ་ལས་ གྲོགས་ངན་སང་པའི་རྗེས་སུ་ ཕན་ཐོགས་སྤུ་ཙམ་མེད་པའི་ སྨྱོ་རྫས་དུག་བཞིན་སང་།
དམིགས་གསལ་ལཱ་མེད་དལ་ཁོམས་ཅན་གྱི་དུས་ཚོད་ལུ་ རྫས་ངན་སྤྱོད་དེ་སྡོད་ཉེན་ཆེཝ་ལས་ རྡོག་མ་བཟའ་ནི་སང་སྟེ་ ཁ་དལཝ་མ་བཞག་མ་ནི་གྲོངས་ ལུས་དལཝ་སྡོད་དུས་ལཱ་ངན་སང་སྟེ་ རབ་འབྱུང་ན་ཕྱག་མཆོད་བསྐོར་ར་འབད་ ཡིད་སྨྱོ་རྫས་ཕྱོགས་སུ་མ་གཡོ་བར་ དོན་ལྡན་བཟང་པའི་བྱ་བ་ཚུ་ལུ་ལྷག་པར་བརྩོན། དེ་མ་ཡིན་ན་སྨྱོ་རྫས་སང་ནའི་ཐབས་ཕན་ནུས་ཅན་ཅིག་ ལུས་སྦྱོང་འབད་ནི་དང་ ནང་པའི་ཏིང་ངེ་འཛིན་སྒོམ་ནི་ གཞན་ཕྱི་རྒྱལ་ལུགས་ཀྱི་སྒོམ་མ་འདྲཝ་ཚུ་ཉམས་སུ་བླང་ན་ མ་བརྟག་བག་མེད་ཀྱི་
སྤྱོད་པ་སང་ཚུགས་སྟེ་ ལུས་བདེ་ ལུས་བདེ་ན་རྩ་འཕྲང་ རྩ་འཕྲང་ན་སེམས་འཕྲང་སྟེ་ བདག་གཞན་གཉིས་ཀའི་ མི་ཚེ་ཞི་བདེ་ལུ་བཀོད་ཚུགས་པའི་ཕན་ཐོག་ཆེ།
ཁའི་ཀེན་སར་ཐོབ་པའི་ཟས་ལུ་སྤྱོད་པའི་མི་རྣམས་ནི་ བློ་སེམས་གྲོགས་ངན་ལུ་གཏད་ གྲོགས་ངན་གྱིས་རྫས་ངན་སྤྱོད་ དེས་གཉིས་ཀ་ རྣམ་གཡེང་དབང་གིས་ཉིན་མཚན་ཟད་ ལྷོད་གཡེང་བྱེད་དེ་ལོ་དང་ཟ་བ་རྫོགས་ མཐའ་འཇུག་རེ་བ་སྟོང་པཡི་ངང་ནས་འཆི་བ་མདུན་དུ་བསུ་སྟེ་ མི་ཚེ་འཕྲོ་བརླག་གི་རྣམ་ཐར་སྐྱོ་སི་སི་ལུ་འགྱུརཝ་ལས་ ཁའི་ནད་གཞི་ཀེན་སར་འདི་ནི་ འགྲོ་བ་རང་སའི་སྲོག་བརྐུ་བའི་རྐུན་པོ་ ཞི་བདེ་འཕྲོག་པའི་ཆོམ་རྐུན་ འཆི་བ་ཤིན་རྗེ་ཀྱི་ཕོ་ཉ་ཨིནམ་ཤེས་ཏེ་ ཁའི་ཀེན་སར་རྩ་མེད་བཏང་དགོཔ་ག་
ནི་བ་གལ་ཆེ།། །།
ཁུངས་གཏུག་རྒྱབ་རྟེན་ཡིག་ཆ༽
འབྲུག་གནས་སྟངས་གསར་ཤོག།
ལོ་ལྟར་གསོ་བའི་གནས་ཚུལ་སྙན་ཞུ་ ༢༠༡༥ ཅན་མ།
འཛམ་གླིང་གསོ་བའི་ལས་ཁུངས/ཚོགས་པ།
